CEBU, Philippines — Hingpit nga gibiyaan sa pamilyang Siano ang ilang panimaye sa may St. Luke Street, Don Bosco Village, Punta Princesa, Dakbayan sa Sugbo human usa ka dakong sinkhole ang namugna sa kilid nga bahin sa ilang balay nga mosobra sa 20 ka tiil ang giladmon.

Matud ni Russwel Siano nga 27 ka tuig na sila nagpuyo sa maong lugar apan kadto pa siya nakakita sa maong sinkhole.

Sumala pa ni Siano nga alas 2 pasado sa kaadlawon nakamata sila tungod kay adunay kusog nga kurog hinungdan nga iyang gisusi ang kilid nga bahin sa ilang balay kay adunay kanaas nga murag dagat apan tungod kay ngitngit iyang gigamitan og flashlight.

Maoy iyang nakita nga adunay nagbawod-bawod nga tubig ug pipila ka gutlo nalungag na dayon hangtud nga kini nilawom kay kaduha man kini nikankan.

Gitug-an ni Siano nga ila lang una biyaan ang ilang gipuy-an tungod kay nabalaka sila sa ilang kahimtang ilabi na nga kanunay pa masinati ang pag-uwan-uwan ug maoy iyang panghinaut nga masusi kini sa Mines and Geo-Sciences Bureau aron mahatagan dayon sila og mga angayan nga buhaton sa ilang panimalay.

Ang tigpamaba sa MGB-7, Marian Codilla, nitug-an nga dili una patabunan ang maong lugar ug dili kini paduolan og mga tawo sulod sa lima ka metros gikan sa baba sa lungag samtang ipadayon ang monitoring.

Gitug-an ni Codilla nga dili usab angayan labayan og basura ang lungag aron dili magka-contaminate ang tubig ug likayan usab ang pagtrabaho sa bisan unsa sa maong lugar. | Source: BANAT NEWS