HUMAN sa insidente nga aduna’y kinabuhi nga nakalas ug usa ang samdan sa usa ka quarry sa Barangay Tuburan Sur, dakbayan sa Danao, dali nga nipadala og team ang Mines and Geosciences Bureau (MGB) 7 niadtong Martes aron susihon ang maong quarry site.

Base sa rekord sa Cebu Provincial Environment and Natural Resources Office (PENRO) nga ni-expire na niadtong Septiyembre 12, 2014 ang permit sa maong quarry ug wala na kini ma-renew tungod kay dili kini luwas.

Na-isyu ang maong permit sa usa ka Ingracia Perez niadtong Septiyembre 11, 2013.

Matod ni Azmir Garcia sa PENRO nga ang pagkubkob og anapog sa dapit usa ka ilegal.

Ubos sa Department Administrative Order (DAO) 92-30 nga giamyendahan sa DAO 92-31, gihatag ngadto sa local government units ang pagpatuman og small scale mining laws sa lugar nga wala gideklarar nga government mineral reservation.

Anaa sa provincial governor o sa city mayor ang pag-isyu og permit sa pagkubkob og bas ug graba ug ubang quarry resources nga dili molapas og lima ka ektarya. Matod ni MGB 7 Director Loreto Alburo nga mas gipalapdan pa nila ang ilang partnership sa LGUs aron mahunong ang ilegal nga pagmina ug quarry.

“We need the help of local community leaders and other stakeholders to report any questionable operations which are illegally extracting mineral resources,” ni Alburo pa.

Base sa balaod, ang lehitimo nga operasyon sa quarry kinahanglan nga aduna’y pagprotehir sa kalikopan, luwas ang mga trabahante niini ingon man ang komunidad nga duol niini.

Nataho nga usa ka lalake ang namatay human nahugno ang anapog sa maong dapit. | Sunstar Super Balita