HUMAN mipirma si Environment Secretary Roy Cimatu og Department Administrative Order 2018-13, ang regional office na sa Mines and Geosciences Bureau ang modawat sa aplikasyon ingon man mo-issue sa permit ug moaprobar sa tanang mineral exploration sa ginsakopan niini.

Gibutyag ni MGB 7 Regional Director Loreto Alburo nga nipirma si Cimatu sa paglibkas sa centralized nga pagkuha og mineral exploration permit.

Sa 2013 gibalhin sa national office ang tanang aplikasyon ug pag-issue og permit sa mineral exploration.

Apan daan na kini nga anaa ubos sa Republic Act 7942 kun Philippine Mining Act of 1995.

Gipasabot ni Alburo nga sila na ang modawat sa aplikasyon ug ang regional director na usab ang moaprobar niini.

Nasayran nga nalimitahan ang pag-apply tungod kay layo ang aplikasyon niini.

Malaumon hinuon si Alburo nga aduna’y mo-apply nga mga kompaniya karon nga anaa na nila ang pagproseso niini pagbalik.

Sa labing uwahi nga datus sa MGB 7, mas nisaka ang demand sa construction materials sa Central Visayas o kadtong gikan sa mina, tungod sa nagpadayon nga mga proyekto ubos sa Duterte Administration.

Ang administrasyon karon mipaspas sa tanang mga proyektong imprastraktura nga gitumong alang sa pagpalambo sa nasod ug pagmugna og mga trabaho. Sugod sa 2016, ang mga minerales nga gigamit sa construction mikusog. (HBL) | Sunstar Cebu